നിത്യവുമുള്ള യോഗാഭ്യാസം മൂലം രാംദേവിനു ദീര്ഘനാള് ഭക്ഷണമില്ലാതെ കഴിയാനാവുമെന്ന് അനുയായികളില് പലരും വിശ്വസിച്ചിരുന്നെങ്കിലും ഈ പുതുതലമുറ സിദ്ധനുമാത്രം അക്കാര്യത്തില് സംശയമില്ലായിരുന്നു. ഇനിയും നിരാഹാരംകിടന്നാല് യോഗനടത്താന് പോയിട്ടു യോഗ്യമായിട്ടൊന്നിരിക്കാന് പോലും യോഗമില്ലാതെയാവുമെന്ന് യോഗിവര്യനു മനസ്സിലായി. അതോടെ ഏഴുനാളത്തെ നിരാഹാരം അവസാനിപ്പിച്ച് കൂടുംകുടക്കയുമെടുത്ത് രാംദേവ് ആശുപത്രി പൂകി.
അഴിമതിക്കും കള്ളപ്പണത്തിനുമെതിരെ ഏഴു ദിവസമായി നിരാഹാര സമരം നടത്തുന്ന യോഗാ ഗുരു ബാബ രാംദേവിനെ ആരോഗ്യനില മോശമായതിനെതുടര്ന്ന് ഡെറാഡൂണിലെ ആശുപത്രിയിലേക്ക് മാറ്റുകയായിരുന്നു. രക്തസമ്മര്ദ്ദവും പള്സ് നിരക്കും ക്രമാതീതമായി കുറഞ്ഞതിനാല് ഹൃദയത്തിന്റെ നില തകരാറിലാകുമെന്ന് ചീഫ് മെഡിക്കല് ഓഫീസര് യോഗേഷ് ചന്ദ്ര ശര്മ മുന്നറിയിപ്പ് നല്കിയതിനെ തുടര്ന്നാണ് രാംദേവിനെ ആശുപത്രിയിലേക്ക് മാറ്റിയത്. നിര്ജലീകരണവും രാംദേവിനെ ബാധിച്ചിട്ടുണ്ട്.
രാംദേവിനൊപ്പം 183 അനുയായികളും ആശ്രമത്തില് നിരാഹാരം അനുഷ്ഠിക്കുന്നുണ്ടായിരുന്നു. മനുഷ്യദൈവത്തിനും ഭക്ഷണംകഴിക്കാതെ പറ്റില്ലെന്ന് തെളിഞ്ഞ സ്ഥിതിക്ക് ഇവരിനി നിരാഹാരം തുടരുമോ എന്നേ അറിയേണ്ടതുള്ളൂ.
ബാബ രാംദേവിന്റെ ആരോഗ്യനിലയെ അവഗണിച്ചതിന് കേന്ദ്രസര്ക്കാരിനെ അന്നാ ഹസാരെ വിമര്ശിച്ചു. കേന്ദ്രസര്ക്കാര് രാംദേവിനോട് കുറച്ച് മനുഷ്യത്വം കാണിക്കണമെന്നും മാനുഷീകമായ പരിഗണന വച്ച് ഇക്കാര്യത്തെ നോക്കിക്കാണണമെന്നും ഹസാരെ അഭ്യര്ഥിച്ചു.
ഭരണഘടനയനുസരിച്ച് പ്രതിഷേധിക്കാനുള്ള അവകാശം ഒരു പൗരനുണ്ടെന്നും ജനാധിപത്യവ്യവസ്ഥയില് ജനങ്ങള് സമരത്തിലിറങ്ങുന്നതില് തെറ്റില്ലെന്നും ഹസാരെ പറഞ്ഞു.
No comments:
Post a Comment
Note: Only a member of this blog may post a comment.