തേഞ്ഞിപ്പലം: പത്ത് ആവശ്യങ്ങളുന്നയിച്ച് കെ.എസ്.യു കാലിക്കറ്റ് യൂണിവേഴ്‌സിറ്റി വൈസ്ചാന്‍സലര്‍ക്ക് അവകാശപത്രിക നല്‍കി. 2009 ബാച്ച് ബി ടെക് വിദ്യാര്‍ത്ഥികളെ ഇയര്‍ ഔട്ടില്‍ നിന്ന് ഒഴിവാക്കുക, സര്‍ട്ടിഫിക്കറ്റ് വിതരണത്തിലെ കാലതാമസം ഒഴിവാക്കുക,
പുനര്‍മൂല്യനിര്‍ണയം വേഗത്തിലാക്കുക, ഇടതുപക്ഷ സിന്‍ഡിക്കേറ്റ് നിര്‍ത്തലാക്കിയ ബി.എസ്.സി പ്രിന്റിങ്ങ് ടെക്‌നോളജി, ബാച്ചിലര്‍ ഓഫ് ഫിസിക്കല്‍ എജ്യുക്കേഷന്‍ തുടങ്ങിയ കോഴ്‌സുകള്‍ കാലിക്കറ്റ് യൂണിവേഴ്‌സിറ്റി ക്യാമ്പസില്‍ തന്നെ പുനരാരംഭിക്കുക, യൂണിവേഴ്‌സിറ്റി ക്യാമ്പസിലെ ഉപയോഗ ശൂന്യമായ ഇന്‍ഡോര്‍ സ്റ്റേഡിയം, ജിംനേഷ്യം, ഓപ്പണ്‍ എയര്‍ തിയേറ്റര്‍ എന്നിവ ഉപയോഗയോഗ്യമാക്കുക, പ്രൈവറ്റ് വിദ്യാര്‍ത്ഥികളുടെ കോഴ്‌സുകള്‍ ക്രെഡിറ്റ് ആന്‍ഡ് സെമസ്റ്റര്‍ സമ്പ്രദായത്തിന് കീഴിലാക്കുന്ന നടപടി വേഗത്തിലാക്കുക. ദേശീയപാതയില്‍ ബസ് വെയിറ്റിങ്ങ്‌ഷെഡ് നിര്‍മ്മിക്കുക, വിവിധ ആവശ്യങ്ങള്‍ക്ക് യൂണിവേഴ്‌സിറ്റിയില്‍ അപേക്ഷ കൊടുക്കുന്ന അപേക്ഷകള്‍ക്ക് അക്‌നോളഡ്ജ്‌മെന്റ് നല്‍കുക, വിവരാവകാശ നിയമപ്രകാരം അപേക്ഷ കൊടുക്കുന്ന അപേക്ഷകര്‍ക്ക് രശീത് നല്‍കുകയും യഥാസമയം വ്യക്തമായ മറുപടി നല്‍കുന്നതിനുളള നടപടി എടുക്കുകയും ചെയ്യുക, അധ്യാപന മേഖലയില്‍ നിന്നും എം.സി.എ ബിരുദധാരികളെ ഒഴിവാക്കാനുളള നടപടി പിന്‍വലിക്കുക, എന്നീ ആവശ്യങ്ങളടങ്ങുന്ന പത്രികയാണ് വൈസ് ചാന്‍സലര്‍ക്ക് നല്‍കിയത്. നൂറുകണക്കിന് പ്രവര്‍ത്തകര്‍ പ്രകടനമായെത്തിയാണ് അവകശ പത്രിക സമര്‍പ്പിച്ചത്. പരിപാടി യൂത്ത് കോണ്‍ഗ്രസ് മുന്‍ സംസ്ഥാന പ്രസിഡന്റ് അഡ്വ. ടി സിദ്ദീഖ് ഉദ്ഘാടനം ചെയ്തു. കെ എസ് യു മലപ്പുറം ജില്ലാ പ്രസിഡന്റ് റിയാസ് മുക്കോളി അധ്യക്ഷനായിരുന്നു. ഇഫ്തികാറുദ്ദീന്‍ രണ്ടത്താണി, ജിഷാം പുലാമന്തോള്‍, അനീഷ് കരുളായി, രാജേഷ് ചാക്യാടന്‍, പി നിധീഷ്, ഫാറൂഖ് കാടപ്പടി, ടി പീയൂഷ്, ടി പി അക്ത്താഫ്, സഫീര്‍ജാന്‍ പാണ്ടിക്കാട്, സല്‍മാന്‍ കോട്ടക്കല്‍, എ സുഭീഷ് സംസാരിച്ചു.
No comments:
Post a Comment
Note: Only a member of this blog may post a comment.